ՀԱՐՑ 1։ Կարո՞ղ եմ օգտվել ծրագրից, եթե բավարարում եմ հիմնական պայմաններին, սակայն հողատարածք չունեմ։

ՊԱՏԱՍԽԱՆ։ Ծրագրից օգտվելու համար հողատարածքի առկայությունը պարտադիր պայման է․ հողատարածք ձեռք բերելուց հետո կարող եք դիմել և աջակցություն ստանալ ծրագրով նախատեսված բնակավայրերից որևէ մեկում տուն կառուցելու համար (բնակավայրերի ցանկը՝ https://mlsa.am/news/1177 )։

 

ՀԱՐՑ 2։ Եթե վարկային վատ պատմություն ունեմ, կարո՞ղ եմ համարվել ծրագրի շահառու։ 

ՊԱՏԱՍԽԱՆ։ Այո՛, եթե բավարարում եք ծրագրով սահմանված հիմնական պայմաններին և նախատեսում եք տունը կառուցել 16 մլն դրամի շրջանակում՝ չներգրավելով հավելյալ վարկային միջոցներ, ապա վարկային վատ պատմություն ունենալը խոչընդոտ չէ։

 

ՀԱՐՑ 3։ Ծրագրից օգտվելու համար պարտադի՞ր է հաշվառում ունենալ ծրագրով հաստատված բնակավայրերից որևէ մեկում։

ՊԱՏԱՍԽԱՆ։ Ծրագրով հաստատված 49 սահմանամերձ բնակավայրերի դեպքում պարտադիր պայման է, որպեսզի շահառուները (ամուսիններից առնվազն մեկը) ծրագրին դիմելու օրվա դրությամբ նախորդ 1 տարվա ընթացքում հաշվառված լինեն տվյալ բնակավայրում (ցանկը՝ https://mlsa.am/news/1177 )։

Մյուս 18 բնակավայրերի դեպքում պարտադիր պայման է, որպեսզի շահառուներն ունենան առնվազն մեկ՝ 10 տարին չլրացած երեխա և նախորդ 1 տարվա ընթացքում Երևան քաղաքում չունենան հաշվառում, անշարժ գույք կամ գնման իրավունք (բնակավայրերի ցանկը՝ https://mlsa.am/news/1177)։

 

ՀԱՐՑ 4։ Ի՞նչ հիմնական պայմանների պետք է բավարարեմ՝ ծրագրից օգտվելու համար։

ՊԱՏԱՍԽԱՆ։ Ծրագրի շահառու կարող են դառնալ՝

․ գրանցված ամուսնության մեջ գտնվող, առնվազն 1 անչափահաս երեխա և ՀՀ քաղաքացիություն ունեցող ամուսինները,

․ գրանցված ամուսնության մեջ գտնվող, անչափահաս երեխա չունեցող և ՀՀ քաղաքացիություն ունեցող ամուսինները, որոնց տարիքների հանրագումարը չի գերազանցում 75-ը (ներառյալ), Միաժամանակ, շահառու կարող են դառնալ առնվազն 1 անչափահաս երեխա և ՀՀ քաղաքացիություն ունեցող միայնակ ծնողները՝ այրիները կամ միայնակ մայրերը։

 

ՀԱՐՑ 5։ Ի՞նչ քայլեր պետք է կատարեմ ծրագրի շահառու դառնալու համար։

ՊԱՏԱՍԽԱՆ։ Ծրագրից օգտվելու համար անհրաժեշտ է դիմել ԱՍՀ նախարարության հետ համագործակցող բանկերից որևէ մեկին՝ ԱԿԲԱ բանկ, Ամերիաբանկ, Էվոկաբանկ, Կոնվերս Բանկ, Յունիբանկ, Ֆասթ բանկ և Ֆինքա ՈՒՎԿ։ Անհրաժեշտ է բավարարել ծրագրի հիմնական պայմաններին և ունենալ հողամաս, շինարարական աշխատանքներ իրականացնելու թույլտվություն, ինչպես նաև նախագծանախահաշվային փաստաթղթեր։