Պայմանագիրը ստորագրել են Աշխատանքի և սոցիալական հարցերի նախարար Արսեն Թորոսյանը, Հայաստանի արհմիությունների կոնֆեդերացիայի նախագահ Էլեն Մանասերյանը և Հայաստանի գործատուների հանրապետական միության նախագահ Վահագն Համբարձումյանը։

 

Իր ելույթում նախարար Թորոսյանը նշել է, որ փաստաթղթի ստորագրումը ևս մեկ կարևոր քայլ է սոցիալական գործընկերների հետ համակարգված ու փոխշահավետ համագործակցության ամրապնդման ուղղությամբ, որի առանցքային նպատակն աշխատողների և գործատուների շահերի հավասարակշռված պաշտպանության ապահովումն ու արդյունավետ երկխոսության կառուցումն է։

 

Արսեն Թորոսյանը նաև ընդգծել է, որ բոլոր մակարդակներում սոցիալական գործընկերության զարգացումը և աշխատանքային հարաբերությունների կարգավորման մեխանիզմների շարունակական բարելավումը ՀՀ կառավարության ծրագրի առաջնահերթություններից է։

 

Նախարարը նշել է, որ պայմանագրի շրջանակում նախատեսվող աշխատանքները կունենան իրական և շոշափելի արդյունքներ, որոնք կնպաստեն աշխատողների և գործատուների շահերի պաշտպանությանն ու մեր երկրի սոցիալ-տնտեսական զարգացմանը: