Աշխատանքի և սոցիալական հարցերի նախարարի տեղակալներ Աննա Ժամակոչյանն ու Տաթևիկ Ստեփանյանը մասնակցել են «Միասին հանուն սոցիալական համայնքների» ծրագրի արդյունքների ամփոփման միջոցառմանը։ 

Ծրագրի փակման միջոցառման շրջանակում գործընկերներին և ոլորտի շահագրգիռ կողմերին ներկայացվել են ծրագրի ձեռքբերումներն ու հիմնական արդյունքները, քննարկել կիրառված մոդելներն ու դրանց դերը՝ համայնքային մակարդակում աղքատության հաղթահարմանն ուղղված օրակարգի և մեխանիզմների ձևավորման համատեքստում:

Մասնակիցները քննարկել են նաև ծրագրի փորձառությունը և այն Հայաստանի տարբեր համայնքներում փորձարկելու հնարավորությունները, ինչպես նաև արդեն իսկ ստեղծված կառույցների ու ծառայությունների շարունականության ապահովման խնդիրները:

Հիշեցնենք, որ «Միասին հանուն սոցիալական համայնքների» ծրագիրն իրականացվել է  Հայաստանի 4 մարզերում՝ Սյունիք, Արմավիր, Շիրակ և Տավուշ՝ թիրախավորելով 9 խոշորացված համայնքներ, որտեղ մշակվել և ներդրվել են տեղական սոցիալական պլաններ, և որոնց շրջանակում տեղական 9 կազմակերպությունների կողմից  սոցիալական ծառայություններ են մատուցվել թիրախ համայնքների ավելի քան 3300 (800 ուղիղ և 2500 անուղղակի շահառուներ) խոցելի բնակիչներին այդ թվում՝ երեխաներ, տարեցներ, հաշմանդամություն ունեցող անձինք, կանայք:

Ծրագիրն իրականացվել է Եվրոպական միության և Ավստրիական զարգացման համագործակցության բաժնի ֆինանսական աջակցությամբ Հիլֆսվերկ միջազգային կազմակերպության կողմից՝ Հայաստանի սոցիալական աշխատողների ասոցիացիայի, Գործընկերություն և ուսուցում ու Ընտանիք և համայնք կազմակերպությունների հետ համագործակցությամբ: